Ortigueira renovará a cuberta e fachada do centro social do Viso cun proxecto ao que destina 38.943 euros

• As obras inclúense no plan do goberno local para conservar e protexer infraestruturas e contemplan a reparación do tellado e a renovación de canlóns, bajantes e da imaxe da fachada.
• Muras sinala que este proxecto permitirá “conservar unha construción moi empregada polos vecinos e veciñas, un punto de encontro no que se realizan diversas actividades de dinamización cultural e social”.

O equipo de goberno local de Ortigueira continúa co seu programa de protección e acondicionamento de infraestruturas no municipio. Nesta ocasión, dedicará 38.943 euros ao proxecto para reparar as cubertas do centro social do Viso, na parroquia de Céltigos.

O alcalde, Juan Penabad Muras, define a medida “como esencial para conservar un edificio moi empregado polos veciños e veciñas, un punto de encontro non que se realizan diversas actividades de dinamización cultural e social”.

Os traballos permitirán solucionar as deficiencias que presenta na actualidade a construción debido á súa antigüidade. As laxas de lousa e o seu soporte de entablado e a estrutura de madeira están deterioradas, así como os canlóns e baixantes, que non funcionan correctamente e necesitan dunha conexión eficiente á rede de recollida de augas. Ademais, as fachadas presentan desgaste e sucidade.

Co obxectivo de dar solución a esta situación, o Concello propón resolver a nova estrutura de cuberta con elementos de madeira laminada de abeto. Sobre eles colocaranse correas de madeira laminada e paneis sándwich con acabado de madeira vista. Impermeabilizarase con lámina e, sobre ela, instalaranse as laxas de lousa tradicional.

Á súa vez, as obras proxectan a colocación de canlóns e baixantes de aluminio, evitando así a caída de auga sobre as fachadas, eliminando o risco de que aparezan manchas de humidade e fungos. As baixantes da fronte e o soportal conectaranse a un punto de recollida moi próximo, repoñéndose o pavimento. Os traballos tamén inclúen a mellora estética da fachada con nova pintura.

“Desde o equipo de goberno local impulsamos a recuperación e a conservación de infraestruturas coma esta, de grande importancia para a dinamización da vida no noso municipio, ofrecendo nela oportunidades formativas e de lecer á cidadanía”, indica Muras, que sinala que este tipo de centros “son tamén espazos para compartir, para estreitar lazos”.