O Teatro de Beneficencia acolleu esta mañá o programa ‘Toponimízate!’, para saber máis sobre os nomes de lugares en Ortigueira

• Un total de 280 persoas asistiron ao acto
• Vicente Feijoo, coordinador da unidade de toponimia da Real Academia Galega, ofreceu unha charla explicativa centrada en “Galicia Nomeada” o proxecto no que están a traballar desde a RAG para recuperar os nomes da xeografía galega
• Feijoo destacou a importancia de preservar os nomes de lugares orteganos, xa que son unha fonte inesgotable de patrimonio histórico e cultural

O Teatro da Beneficencia de Ortigueira acolleu no día de hoxe unha charla enmarcada no programa “Toponimízate!”, impulsado polo Concello de Ortigueira xunto coa Real Academia Galega, que pretende preservar e recuperar o máximo número de nomes de lugares da xeografía galega.

O encargado de dirixir o acto foi Vicente Feijoo, coordinador da unidade de toponimia da Real Academia Galega, e pertencente a numerosos proxectos relacionados coa toponimia en Galicia durante máis de 10 anos.

Ao evento, que estaba aberto á asistencia de todos os veciños do municipio, asistiron unhas 280 persoas.

A maior parte do tempo o coloquio centrouse no proxecto no que agora están a centrar os seus esforzos, “Galicia Nomeada”. Trátase dun programa que permite recuperar os nomes de pequenos lugares, camiños, fontes ou montes mediante xeolocalización.

Moitos destes nomes perviven grazas á memoria de xente maior, que non ten a facilidade nin os coñecementos para poder rexistralos. Por este motivo, Feijoo animou a toda a xente nova, e non tan nova, que asistiu á charla de hoxe a preguntar á xente maior que lles rodea sobre a toponimia próxima. Desa forma poñerían o seu gran de area en “Galicia Nomeada”, e tamén contribuirían a este proxecto de carácter colaborativo para poder conservar o patrimonio.

Rexistrar estes nomes é tan sinxelo como acceder á páxina web https://galicianomeada.xunta.gal/sixtop/visor e elixir a opción ‘quero colaborar’.

Ao acto asistiu o concelleiro de Cultura, Juan Cao, que quixo “felicitar á Real Academia Galea e a Vicente Feijoo, en particular, polo levar a cabo este programa, ‘Galicia Nomeada’, que ten unha gran importancia non só para o municipio de Ortigueira, senon para toda Galicia”.

O edil expresou o seu desexo de “preservar e manter os nomes de lugares, camiños, montes, e máis cousas de Ortigueira, xa que é fundamental coidar o noso patrimonio histórico e cultural”.