Skip to content Skip to main navigation Skip to footer

ARRINCA O CURSO DE ATENCIÓN SOCIOSANITARIA EN ORTIGUEIRA

O alcalde de Ortigueira, Juan Penabad Muras, participou esta mañá na inauguración do curso de atención sociosanitaria a persoas dependentes en institucións sociais. O taller forma parte do Plan de Emprego Local ( PEL) da Deputación dá Coruña.

O curso formará a unhas 15 persoas desempregadas no ámbito da atención a persoas dependentes. “Unha formación coa que se busca fortalecer as competencias das persoas participantes co fin de facilitar a súa inserción laboral”, destacou o rexedor ortegano. O comezo do curso contou tamén coa presenza de representantes da Deputación, aos que o rexedor ortegano agradeceu “que pensaran en Ortigueira como lugar para acoller un obradoiro como este, que permitirá formar a novos e novas profesionais nun eido tan esencial como o é o de servizos sociais”, sinalou.

As persoas participantes na iniciativa, que terá unha duración de seis meses, proceden de Ortigueira e de concellos próximos como Fene, Cerdido, Cariño, As Pontes e Cedeira.

Á hora de seleccionar ao alumnado tívose en conta ás persoas paradas de longa duración, a mocidade menor de 30 anos non participante en accións do Programa Operativo de Emprego Xuvenil, mulleres, persoas maiores de 55 anos ou que se atopen en risco de exclusión ou situación vulnerable.

Nos próximos días o Concello tamén acollerá, dentro do programa PEL provincial, unha formación de dinamización comunitaria, á que aínda poden inscribirse as persoas interesadas. As solicitudes poderán facerse no rexistro do Concello. Para máis información os e as solicitantes deberán dirixirse á orientadora laboral Marika Álvarez a través do correo electrónico malvarez@concellodeortigueira.com ou chamando ao teléfono 981 40 00 00.

Back to top