Skip to content Skip to main navigation Skip to footer

O CONCELLO APOIA CON 25.000 EUROS A ACTIVIDADE DA CONFRARÍA DE PESCADORES DE ESPASANTE

O Concello de Ortigueira apoia a actividade da Confraría de Pescadores de Espasante cunha subvención de 25.000 euros para o segundo semestre de 2021. A través deste investimento, o Concello pretende promocionar e dinamizar as iniciativas do sector pesqueiro e mariñeiro na zona, así como axudar cos gastos de mantemento das súas instalacións, equipamento e persoal. O alcalde, Juan Penabad Muras, e o patrón maior da Confraría, José Luis Martínez, asinaron esta semana o convenio.

Así pois, a Confraría poderá dedicar esta contribución para impulsar accións ou estudos sobre melloras produtivas e xestión dos novos recursos mariños. A entidade tamén poderá destinar o investimento municipal a actividades de divulgación e campañas que promovan e fomenten o consumo de produtos locais. As actividades formativas que leven a cabo desde o organismo poden, do mesmo xeito, nutrirse desta axuda.

O alcalde de Ortigueira, Juan Penabad Muras, indicou que esta subvención “ten como obxectivo dar o noso apoio ao sector pesqueiro local, co fin de que siga desenvolvéndose e progresando”. “Esta axuda permite cofinanciar elementos de equipamento e instalacións para que o persoal do ámbito desempeñe as súas tarefas contando cos medios necesarios e sigan impulsando a actividade do ámbito, moi importante no municipio”, destacou o rexedor.

Así pois, dita achega tamén permitirá que leve a cabo un proxecto e mellora da comercialización dos produtos da lonxa de Ortigueira, onde é necesario renovar o equipamento de refrixeración e almacenamento para mellorar a capacidade e eficiencia enerxética do espazo. “Deste xeito a Confraría poderá ofrecer produtos de calidade e proxectar unha mellor imaxe de cara aos compradores, facendo que o sector pesqueiro da zona sexa máis competitivo”, remarcou Penabad Muras.

O 100% do orzamento total da axuda está financiado con fondos propios do Concello.

Back to top