TEATRO DOS GHAZAFELHOS LEVA A ORTIGUEIRA OS “MONSTROS NO CAMIÑO”
O Concello de Ortigueira retoma este sábado a programación cultural no Teatro da Beneficencia coa obra destinada ao público familiar “Monstros no camiño”, de Teatro dos Ghazafelhos e con entrada gratuíta.
A representación dará comezo ás 12.00 horas pero o acceso á sala será 15 minutos antes pola porta traseira do teatro, onde o persoal municipal irá acomodando ao público para respectar o aforo reducido e as distancias e medidas de seguridade.
“Monstros no camiño” é a historia de tres investigadores que invocan, coa axuda dunha máquina da súa invención, a todos os monstros das lendas galegas. Existen de verdade os lobishomes, meigas e sacaúntos? Será o que se descubra na propia función.
Esta obra e o resto da programación está suxeita a cambios ou cancelacións segundo as directrices sanitarias derivadas da Covid-19.