Ortigueira xa conta coa súa nova Rúa Inclusión, impulsada polo alumnado do José María Lage

Ortigueira xa conta coa súa nova rúa Inclusión. O vial, que está entre o Paseo Barro Soto e O Mourón, sitúase concretamente na contorna da piscina e o centro de saúde, preto do Centro Aspromor. Precisamente esta localización que a vincula cun centro de referencia en apoio á diversidade funcional é a que lle axudou a ser a elixida.

A rúa denomínase oficialmente como Inclusión desde esta mañá, cando foi inaugurada por representantes do executivo local, doutros grupos políticos, alumnos do CEIP José María Lage e do instituto da localidade e persoal de Aspromor.

O bautizo do vial, un das poucos que quedaban sen nome no municipio, foi precisamente impulsado por estudantes que o pasado ano escolar cursaron 5º e 6º de Primaria no citado centro educativo.

Como vén sendo habitual cada ano, os alumnos participaron nun Concurso da Fundación ONCE. Nesa última edición, a temática era a inclusión. Por iso mesmo, ademais de construír carteis -uno deles foi finalista a nivel Galicia-, puxeron en marcha unha recollida de firmas para bautizar unha das rúas da localidade con ese nome.

Tras realizar todos os pasos administrativos, a proposta de nomeamento da rúa foi levada a pleno a finais do 2023. A corporación aprobou por unanimidade a proposta e esta mañá, coincidindo co Día da Educación, levou a cabo a inauguración.