Ortigueira dálle a benvida a un Nadal no que contará con pista de xeo
O Concello de Ortigueira presenta para este decembro unha ampla programación cultural que estará marcada polo Nadal. Concertos, talleres, teatro, o aceso de luces e, por suposto, a instalación dunha pista de xeo gratuíta na alameda, serán protagonistas nas múltiples actividades de lecer que levarán a cabo durante estas datas.
O acto de inauguración das Festas de Nadal, co aceso de luces do municipio, será hoxe, 7 de decembro, ás 20:00 horas, na Praza de Isabel II.
O sábado, 9 de decembro, o Teatro da Beneficencia acollerá o concerto ‘O s asasinos do tango’, de Ensamble Iulius XIII, dedicado ao compositor arxentino *Ástos Piazzolla. A entrada terá un prezo de 3,50 euros. Durante a semana, os días 12, 13 e 14 de decembro, a biblioteca municipal organiza o BiblioNadal 2023, con actividades tanto para adultos como para os nenos e nenas.
O martes, día 12, realizarase o taller de patchwork de adornos de Nadal. Será impartido por Gabi Villasuso a partir das 16:30 horas. Pola outra banda, mércores e xoves, días 13 e 14, realizarase o contacontos e taller infantil para os nenos e nenas de 3 a 12 anos. Ambas as actividades necesitan previa inscrición na biblioteca ou chamando ao 981 400 101.
A seguinte semana, o martes día 19, realizarase, tamén na biblioteca, o teatro de monicreques ‘O apalpador e a meniña sen medo’, da Xanela do Maxín, que conta a historia deste personaxe galego que, cada ano, trae castañas desde O Courel. Está dirixido a un público a partir de 3 anos e será de entrada libre.
O xoves, día 21, o alumnado da Escola de Música de Ortigueira realizará a tradicional audición de Nadal. Será na propia escola a partir das 19:00 horas.
Continuando coa música, o día 22 terá lugar o concerto de Nadal na Igrexa parroquial de Ortigueira. Será a cargo do grupo Keilin Ensamble, composto por catro violonchelos e unha pianista.
O sábado, día 23, a solidariedade será a base dunha xornada na que se celebrará o festival benéfico a favor de ASPROMOR, organizado polo coro de Espasante en colaboración co Concello de Ortigueira. Será a partir das 18:00 horas no Teatro da Beneficencia.
O domingo, día 24, Ortigueira recibirá unha visita moi especial. Papá Noel chegará ao municipio, ás 16:00 horas, para animar aos máis pequenos e pequenas na Praza de Isabel II. A partir das 17:30 horas comezará a animación con panxoliñas con ‘Os Rueiros’ e ás 18:00 horas será a recepción oficial de Santa Claus.
O mércores, día 27, inaugurarase un dos maiores atractivos deste ano: a pista de patinaxe sobre xeo. A alameda será o escenario perfecto para este ‘Ortigueira on ice’, que se completará con música, xogos e inchábeis para os máis pequenos e pequenas. O acceso será completamente gratuíto e estará dispoñible de 11:00 a 14:00 e de 16:30 a 20:30 horas ata o 30 de decembro.
O xoves, día 28, Xoán Xosé Fernández Abella presentará o seu libro ‘Últimos poemas de eloxios e outros poemas’ no Teatro da Beneficencia.
Para pechar o mes, o venres 29 de decembro, será o gran festival solidario a favor de Galiclown – Pallasos de Hospital, organizado pola Escola de Gaitas de Ortigueira. Será no Teatro da Beneficencia ás 20:00 horas.
Outras actividades
Durante este mes, realizaranse, a maiores, diferentes actividades, como os talleres de Nadal infantís, os días 22 e 29 de decembro e 4 de xaneiro; os cinco roteiros de sendeirismo programados para este mes; a programación da EMCO, que estará dispoñible a través da súa canle de Youtube; ou as tradicionais Xanelas de Nadal, que xa empezaron co seu aceso, que se prolongará ata o venres 22.