O Ministerio de Cultura volve premiar á Biblioteca de Ortigueira polo seu proxecto ‘Tejiendo redes y haciendo caminos’
A Biblioteca Municipal do Concello de Ortigueira vén de ser recoñecida de novo polo Ministerio de Cultura e Deporte. A entidade ortigueiresa recibiu o seu duodécimo premio María Moliner de Animación á Lectura. Na edición do concurso deste 2023, o proxecto da Biblioteca Municipal galardoado foi ‘Biblioteca rural: tecendo redes e facendo camiños’.
O proxecto desenvolvido engloba diferentes actividades, como contacontos ou obradoiros, que se levan a cabo nos centros de Ortigueira, xa sexa en escolas infantís, centros de maiores ou na asociación de discapacitados de Ortegal.
O obxectivo desta proposta é, segundo explican desde o servizo municipal, “facer camiños levando a biblioteca ao último recuncho do municipio”. Ademais, aínda que non sexa unha función propiamente ‘bibliotecaria’, este proxecto tamén axuda á cidadanía para superar as barreiras de comunicación coas administracións.
Esta última función, clave nunha contorna rural e envellecida, cristalízase por exemplo, á hora de pedir citas previas ou a obtención de borradores. “Trátase de tecer redes poñendo gran parte dos nosos esforzos en buscar nexos de unión con entidades, asociacións, colectivos… e así conseguir a máxima cooperación cidadá”, apuntan os responsables.
Coa obtención deste premio, a Biblioteca Municipal de Ortigueira recibirá 2.722,22 euros, que se investirán na adquisición de novos libros.
A biblioteca de Ortigueira leva sendo premiada desde 2007 polas súas diferentes actividades. Ano tras ano, estes premios organizados polo Ministerio de Cultura e Deporte, seleccionan 370 plans de animación á lectura por parte das bibliotecas públicas de municipios con menos de 50.000 habitantes. Xa son doce os galardóns que recibiu a biblioteca municipal, resultando en 2007 e 2009 finalistas.
Un ano máis, con este recoñecemento a Biblioteca Municipal de Ortigueira continúa promovendo espazos e hábitos de coñecemento a través da lectura, tanto a nenos como a adultos. “Todo para que non falte lectura en ningún recuncho”, engaden desde o servizo de biblioteca, ao que o Concello de Ortigueira quere dar os seus máis sinceros parabéns polo proxecto desenvolto un ano máis e a súa traxectoria ao longo dos últimos anos para fomentar a literatura no municipio.