O Concello avanza na redacción do PACES e habilita unha enquisa sobre o consumo enerxético dirixida ao comercio local

• No formulario, que poderá cubrirse en liña ou presencialmente, deben sinalarse os kilovatios consumidos na última factura eléctrica.
• A partir dos datos solicitados o Concello realizará posteriormente un inventario de Emisións de Referencia.
• “Pedimos a colaboración dos establecementos para analizar en profundidade a situación na que se atopa o consumo enerxético e así elaborar unha folla de roteiro para seguir mellorando a nosa eficiencia neste eido, o que contribuirá a reducir o gasto e as emisións contaminantes”, sinalou o alcalde de Ortigueira, Juan Penabad Muras.

O Concello de Ortigueira avanza na redacción do seu Plan de Acción para o Clima e a Enerxía Sostible (PACES). O equipo de goberno local acaba de habilitar unha enquisa, que poderá realizarse en liña ou presencialmente, sobre consumo enerxético dirixida ao comercio local. As persoas que a cubran deben indicar os kilovatios consumidos na última factura eléctrica para poder elaborar posteriormente un inventario de Emisións de Referencia do concello.

“Pedimos a colaboración do comercio local, e sei que a imos ter, para analizar en profundidade a situación na que se atopa o consumo enerxético e así elaborar unha folla de ruta para seguir mellorando a nosa eficiencia neste eido, o que contribuirá a reducir ou gasto e as emisións contaminantes”, sinalou o alcalde de Ortigueira, Juan Penabad Muras.

Os establecementos que queiran anotar o seu consumo no formulario poderán facelo pinchando aquí para acceder á enquisa en liña. Desde o Concello tamén informan de que o equipo encargado de redactar o PACES desprazarase tamén ata os negocios para realizar as enquisas in situ. Esta iniciativa forma parte do proxecto europeo do Pacto das Alcaldías, ao que o Consistorio ortegano se adheriu en marzo deste ano, e no que participan autoridades locais e rexionais co obxectivo e compromiso de mellorar a súa eficiencia enerxética, empregar fontes de enerxía renovable e reducir as emisións de CO2.

A redacción do documento conta cun orzamento de 6.000 euros e a través deste a empresa adxudicataria xa está a realizar unha auditoría municipal de consumos enerxéticos co fin de conseguir a mitigación do 40% das emisións de CO2 no ano 2030 no municipio.