Ortigueira volve ser referente en materia de formación coa acollida da segunda edición da Universidade Sénior

• O Concello colabora de novo coa UDC para achegar o programa de democratización do coñecemento á poboación maior de 50 anos
• A formación constará de tres módulos con clases teóricas e prácticas que terán lugar nos meses de abril e maio
• Muras sinala que “a nova edición do programa conta cunha maior duración e forma parte da aposta que facemos desde o goberno local pola formación, ferramenta esencial para construír unha sociedade progresista”.
• O prazo de inscrición xa está aberto e pode realizarse de forma telemática e presencial ata o 18 de abril.

Ortigueira acollerá unha nova edición do programa de democratización do coñecemento da Universidade Sénior. Despois do éxito da primeira, o Concello volve colaborar coa Universidade da Coruña (UDC) para acoller durante os meses de abril e maio unha nova formación para persoas maiores de 50 anos.

“ Despois da boa acollida do programa na súa primeira edición, celebrada no noso municipio o ano pasado, desde o equipo de goberno local volvemos apostar pola formación e seremos de novo sede deste proxecto, co que se busca ofrecer ás persoas maiores de 50 anos a oportunidade de seguir aprendendo”, sinala o alcalde de Ortigueira, Juan Penabad Muras.

A iniciativa levarase a cabo a partir do 20 de abril e finalizará o 30 de maio e contará con sesións teóricas dous días da semana de 17:00 a 19:00 horas no Teatro da Beneficencia, e con sesións prácticas, impartidas polo profesorado da Universidade da Coruña.

Programación

O programa consta de tres módulos, o primeiro deles sobre patrimonio social e cultural, dentro do que se recollerán clases sobre lingua e literatura galega, arte contemporánea, arquitectura antiga e unha visita cultural pola zona. O segundo será sobre medioambiente e sostibilidade, no que se tratarán temas como enxeñería e tecnoloxía ambiental, agronomía do mar e terrestre e realizarase unha excursión ao campo na zona.

Por último, levarase a cabo un terceiro módulo sobre saúde e benestar, con formacións acerca de estratexias para coidadores e coidadoras de persoas en situación de dependencia, educación para a saúde e unha sesión práctica de exercicio terapéutico.

Muras sinalou que “a nova edición do programa conta cunha maior duración e converterá de novo a Ortigueira en sede de coñecemento, referencia na comarca”. O rexedor definiu este tipo de programa como “ ferramenta esencial para construír unha sociedade progresista, igualitaria e xusta”. A iniciativa está organizada pola UDC coa colaboración do Concello e conta con financiamento da Xunta de Galicia.

Muras agradeceu tamén á UDC que volva contar con Ortigueira como sede para este tipo de iniciativa, que tamén contribúe a dinamizar a zona.

Inscricións

A inscrición é gratuíta e pode realizarse de forma telemática a través da seguinte ligazón https://udcseniorortigueira.wordpress.com/ ata o 18 de abril. Desde o departamento de Cultura do Concello ofrécese asesoramento para as persoas que non dispoñan de ordenador.