Ortigueira recibe xuño con dúas presentacións literarias, eventos musicais e teatrais e unha festa en San Xoán
A axenda do mes de xuño en Ortigueira arrinca mañá coa presentación do libro Cancioneiro de Santo Andrés de Teixido, de José Antonio Suárez Aneiros. O encontro terá lugar a partir das 19:30 horas no Teatro da Beneficencia. A publicación conta cunha recompilación de cantigas dedicadas a San Andrés de Teixido e partituras. O acto completarase coa actuación do grupo Os Carecos.
Continúa a programación o sábado 4 de xuño co monólogo Esas cousas marabillosas de Empatía Teatro. Unha obra na que o público terá a súa particular participación e que narra a historia dun mozo cuxa nai se tentou suicidar. Este feito fai que o protagonista comece a facer unha lista de todo o que é marabilloso no mundo. O espectáculo terá lugar a partir das 20:30 horas no Teatro da Beneficencia e ten un custo de 3,50 euros.
O sábado 11 a partir das 18:00 horas o Teatro da Beneficencia acollerá o teatro musical A miña lingua a túa lingua: A cabra Lu de Oviravai. A entrada ao evento é gratuíta. No espectáculo poñerase de manifesto a importancia de aprender diferentes linguas, partindo do galego, dunha forma divertida e amena.
O venres 24 celebrarase San Xoán no municipio con música, sorteos e unha comida popular. O encontro está organizado polo Concello, ACO Ortigueira e a Comisión de Festas de Santa Marta. A xornada comezará ás 14:00 horas cunha sesión vermú e degustación de sardiñas frescas e lañadas. A Tapería, Bar Nogueirido, Casa Giz, Manolo’ s, A Terraza de Laura, Peirao 21 e Mesón Ou Malecón serán os establecementos colaboradores na actividade.
Xa pola noite, a partir das 21:00 horas, celebrarase a festa de San Xoán, con música a cargo da charanga Mekánika e Dúo Boreal. Haberá churrascada popular e as persoas que queiran participar nela poderán adquirir por 20 euros o seu ticket ata o 21 deste mes en Centro Óptica María Mera, Imprenta Olblan, Ferraxería Yáñez, Peirao 21, Black Rose ou chamando ao teléfono da Comisión de Festas 652 005 522.
O mes cultural pecharase o sábado 25 coa presentación do libro “Ecos Esferoides” de Tálamo. O acto realizarase ás 13:00 horas no Centro de San Roque.
Música para a vida
Ademais, durante o mes de xuño a Escola de Música do Concello de Ortigueira programa o ciclo ‘Música para a vida’, programa que se dedica a Ucraína e que constitúe un proxecto educativo, social e cultural a través do que se pretende achegar a toda a poboación aos valores da música, que forma parte do noso día a día.
Os concertos celebraranse ás 19:30 horas nas instalacións da Escola de Música os seguintes días:
– 3 de xuño: piano e voz
– 10 de xuño: vento-madeira e vento-metal
– 16 de xuño: concerto de percusión
– 17 de xuño: música e movemento, guitarra, gaita e acordeón
A entrada aos diferentes espectáculos é libre ata completar o aforo.