Ortigueira consolídase como referente en materia informativa co inicio da segunda edición da Universidade Sénior

• O Teatro da Beneficencia acolleu esta tarde o acto inaugural do novo programa de democratización do coñecemento impulsado pola UDC e o Concello, co financiamento da Xunta.
• Preto de 40 persoas maiores de 50 anos participarán na iniciativa, que constará de tres módulos sobre patrimonio social e cultural, medioambiente e sustentabilidade e saúde e benestar.
• O concelleiro de Educación e Cultura, Juan Cao, destacou o interese que suscita o programa, que aumentou o número de persoas rexistradas con respecto ao ano pasado, así como a súa duración.

Arrinca en Ortigueira a segunda edición da Universidade Sénior, na que participan preto de 40 persoas maiores de 50 anos e que consolida ao municipio como polo formativo da comarca.

O Teatro da Beneficencia acolleu esta tarde a presentación do novo programa de democratización do coñecemento da Universidade da Coruña (UDC) no municipio. No encontro participaron o concelleiro de Educación e Cultura, Juan Cao, e a directora da Universidade Sénior, Matilde García.

“Volvemos constatar que a Universidade Sénior é un programa de interese na zona, contando nesta edición cun maior número de persoas rexistradas con respecto ao ano pasado e unha maior duración”, explicou Juan Cao. “Desde o goberno local é un pracer colaborar coa UDC de novo para achegar a formación a toda a poboación, neste caso ás persoas maiores de 50 anos, que teñen neste programa unha oportunidade para seguir aprendendo”, reflexionou.

O edil sinalou o compromiso e firme aposta do equipo de goberno local “pola educación, chave para seguir progresando, conseguido unha sociedade máis xusta e igualitaria”. Cao tamén agradeceu á UDC “que pensase en Ortigueira como localización para esta iniciativa, que tamén contribúe a dinamizar a zona”. O proxecto está organizado pola UDC coa colaboración do Concello e conta con financiamento da Xunta de Galicia.

Un programa máis ambicioso

A nova edición do programa contará cunha maior duración con respecto ao ano pasado, levándose a cabo nesta ocasión desde hoxe, 20 de abril, e finalizando o 30 de maio. O proxecto contará con sesións teóricas dous días da semana de 17:00 a 19:00 horas no Teatro da Beneficencia, e con sesións prácticas, impartidas por profesorado da Universidade da Coruña.

O programa consta de tres módulos, o primeiro deles sobre patrimonio social e cultural, dentro do que se recollerán clases sobre lingua e literatura galega, arte contemporánea, arquitectura antiga e unha visita cultural pola zona. O segundo será sobre medioambiente e sustentabilidade, no que se tratarán temas como enxeñería e tecnoloxía ambiental, agronomía do mar e terrestre e realizarase unha excursión ao campo na zona.

Por último, levarase cabo un terceiro módulo sobre saúde e benestar, con formacións acerca de estratexias para coidadores e coidadoras de persoas en situación de dependencia, educación para a saúde e unha sesión práctica de exercicio terapéutico.

Programación completa

MÓDULO I: PATRIMONIO SOCIAL E CULTURAL

• 20 de abril. “ Lingua e Literatura Galega”. Prof. Xoan López Viñas

• 21 de abril. “ Camiños da Arte Contemporánea”. Prof. J. Ramón Soraluce Blond

• 27 de abril. “ Catro etapas da arquitectura antiga de Galicia”. Prof. Álvaro J. Iglesias Maceiras

• 29 de abril, de 10:30 a 13:30 horas. Visita Cultural na contorna

MÓDULO II: MEDIO AMBIENTE E SUSTENTABILIDADE

• 4 de maio. “ Enxeñaría e tecnoloxía ambiental”. Prof. Manuel Soto Castiñeiras

• 5 de maio. “Agronomía do mar”. Prof. Javier Cremades Ugarte

• 11 de maio. “Agronomía terrestre”. Prof. Federico Pomar Barbeito

• 12 de maio, de 10:30 a 13:30 horas. Saída de campo na contorna

MÓDULO III: SAÚDE E BENESTAR

• 18 de maio. “ Viaxe cara un sono mellor”. Prof. Carmen de Labra Pinedo

• 19 de maio. “ Coidamos non fogar: Estratexias para coidadores de persoas en situación de dependencia”.
Prof. Ivan de Rosende Celeiro.

• 25 de maio. “Educación para a saúde: Exercicio terapéutico”. Prof. Isabel Raposo Vidal

• 26 de maio, de 10:30 a 13:30 horas: Sesión práctica de exercicio terapéutico

O 30 de maio, a partir das 17 horas, terá lugar o acto de clausura coa Conferencia “Cinema e Creatividade para Seniors”, a cargo de Domingo D. Docampo e Manolo Gómez, e farase entrega de diplomas aos participantes.