O novo goberno de Ortigueira reabre o parque acuático do Malecón para potenciar as alternativas de ocio infantil

Ortigueira volverá poder gozar dun parque acuático na localidade. O persoal municipal ultima a posta a punto da instalación situada no Malecón, anexa aos Xardíns de Julio Dávila, despois de que o novo equipo de goberno local apostase por reabrir este espazo.

O parque acuático acumulaba máis dun lustro pechado e era, por tanto, un recurso infrautilizado. “Quixemos poñelo de novo en funcionamento porque non ten sentido dispoñer de instalacións sen uso. Non se goza delas e xérase unha deterioración que provoca que, co paso dos anos, custe máis reactivalas”, apunta o alcalde, Valentín Calvín. O rexedor considera que o parque de auga é unha fórmula “para que os máis pequenos de Ortigueira socialicen dun modo divertido, refrescante e san”.

Desta maneira, o Concello de Ortigueira tramitou a solicitude de permisos adecuados para volver poñer en marcha o recinto de atraccións de auga. Paralelamente, tamén realizou traballos de mellora nos circuítos internos.

Agora, coa instalación renovada e as autorizacións en regra, o Concello de Ortigueira remata os últimos detalles para reabrir desde leste mesma fin de semana o parque acuático. Así, con esta reapertura da instalación, amplíanse as alternativas de lecer infantil na localidade.

En principio, está previsto que o parque de auga, que conta con media ducia de puntos de xogo, funcione todos os días de 11:00 a 20:00 horas.