O Concello de Ortigueira amplía a súa transparencia co primeiro pleno retransmitido en directo e con voz para os veciños

O Concello de Ortigueira amplía a súa transparencia coa cidadanía. Por primeira vez na historia, unha sesión plenaria celebrada na Casa Consistorial ortigueiresa púidose seguir en vivo e en directo a través de Internet. O pleno celebrado na mañá deste luns foi retransmitido en ‘streaming’ a través da plataforma seneca.tv e desde o momento da súa finalización, está dispoñible para que o consulte toda persoa que así o desexe, ‘cortado’ por intervencións. Tamén se pode revisionar na canle de Youtube do Concello.

A maiores, o pleno tamén foi o primeiro no que os veciños tiveron voz. Porque ao termo da sesión, os presentes no Salón de Plenos tiveron a oportunidade de realizar rogos e preguntas aos representantes da corporación municipal.

Con estas medidas, a corporación demostra o seu compromiso por abrir a institución á cidadanía e o novo executivo local reafirma o valor de transparencia como piar fundamental na súa forma de gobernar.

En canto ao seu contido, a sesión plenaria estivo marcada polas aprobacións das modificacións de crédito para que o goberno municipal poida facer fronte ás obrigacións de pago que se atopou á súa chegada ao Consistorio.

Cabe lembrar que, tras solicitar unha auditoría interna ao servizo de Intervención municipal, a persoa encargada concluíu a mediados de xuño que existía unha débeda coas distintas administracións de 1,97 millóns de euros. A maiores, devandito informe reflectiu que Ortigueira contaba con menos de 3.000 euros (2.811,93 euros, en concreto) para a execución de gastos correntes ata o 31 de decembro de 2023” e que, por tanto, “os créditos orzamentarios atópanse totalmente esgotados”.

Así, por unha banda, aprobouse a modificación de crédito como extraordinario financiado con cargo ao remanente de tesourería por un importe total de 311.782,53 euros. “É necesaria para dotar de crédito suficiente ás facturas e gastos xa comprometidos como a Carreira Popular, o Torneo de Pádel, o Torneo Interparroquial de Fútbol sala, custos de Seitura ou o Xeoparque”, explicou o alcalde, Valentín Calvín. Votaron a favor PP e PSOE, mentres que Primeiro Ortigueira e BNG abstivéronse. Isabel Rego, única concelleira de Xunto a ti e membro do equipo de goberno, non puido estar presente no pleno.

Doutra banda, tamén obtivo os votos suficientes para ser aprobado o recoñecemento extraxudicial de crédito de 366.579,68 euros, que inclúe facturas de diferentes provedores. “Corresponden a gastos realizados sen que houbese crédito nas partidas orzamentarias ou sen o procedemento adecuado”, explicou o rexedor. Este punto tamén foi aprobado cos votos a favor do PP e as abstencións de PSOE, Primeiro Ortigueira e BNG.

A maiores, o pleno tamén estivo a favor de participar no Plan Adicional 2/23 da Deputación da Coruña, que permitirá a Ortigueira recibir 769.655 euros. Deles, 440.821 euros irán destinados a gastos correntes e 283.843 para financiar dúas obras: o aglomerado de camiños en San Claudio, Senra, Freire e Cuíña e a renovación das instalacións do campo de fútbol de San Claudio.

Declaracións contra os macroeólicos

Noutra orde de cousas, cabe destacar o rexeitamento unánime que a corporación expresou á instalación dos parques eólicos de Barqueiro e de Badulaque. A proposta do BNG, todos os grupos políticos recalcaron o seu compromiso de instar ás distintas administracións a emitir informes negativos polo impacto ambiental que as instalacións xerarían no municipio.

Nunha pregunta posterior, o alcalde recalcou a súa firme vontade de “chegar ata as últimas consecuencias”. “Non imos permitir que isto se implante. Pero non é un pensamento de agora, senón de sempre. Desde o primeiro momento traballamos para que non se instalasen estes macroeólicos. Estamos a favor dos veciños e en contra dos macroeólicos. Faremos o que sexa preciso para que non se implanten, sempre dentro da lei”, finalizou.