O alumnado do IES Ortigueira aprende sobre ciberdelitos de natureza sexual cun taller organizado polo Concello

• O obxectivo do curso foi apoderar á mocidade e informar sobre prácticas incorrectas á hora de utilizar Internet e as redes sociais, así como do proceso para seguir cando sexan vítimas do seu mal uso.
• Tanto o alumnado como o profesorado do centro recibiron unha guía na que se recollen todos os aspectos que se trataron na conferencia, impartida por unha avogada experta no ámbito.

O alumnado de 1º da ESO do IES de Ortigueira participou esta semana nun curso sobre ciberdelitos de natureza sexual. O taller, organizado polo Concello e o Centro de Información á Muller (CIM), enmárcase nas actividades municipais de sensibilización e concienciación con motivo do 25 de novembro, Día Internacional Contra a Violencia de Xénero.

“As e os adolescentes son nativos dixitais, a Internet e as redes sociais son o seu día a día e fóronlles de moita utilidade durante a pandemia, por iso é esencial tamén que tendo estas ferramentas saiban empregalas correctamente, evitando prácticas de risco e sendo coñecedores dos delitos asociados”, explicou a concelleira de Igualdade, María Lamelas.

O obxectivo do taller foi apoderar á mocidade e informar sobre prácticas incorrectas á hora de utilizar estas canles dixitais. A clase foi impartida por María Jesús Boo, avogada experta en ciberdelitos, que lle trasladou aos alumnos e alumnas unha visión das consecuencias legais que poden ter as accións en redes sociais “ sen omitir que as TIC son o presente e que ninguén debe ser obrigado a abandonar ou mundo dixital, que hoxe é lugar de coñecemento”.

Neste sentido Boo destacou que son as persoas que acosan, ameazan e facer un mal uso das redes as que deben ser expulsadas, ao mesmo tempo que as e os mozos deben coñecer os mecanismos e lugares aos que poden recorrer cando sexan vítimas dalgunha destas situacións.

No curso tanto o alumnado como o profesorado recibiron unha guía na que se recollen todos os aspectos tratados nesta actividade, que contou con financiamento con cargo aos créditos recibidos polo Concello de Ortigueira por parte do Ministerio de Igualdade e o Pacto de Estado contra a Violencia de Xénero.

Próximas actividades

O 25 de novembro está previsto ás 12:00 horas no Concello un acto de lectura de textos e poemas relacionados coa igualdade e a loita contra a violencia de xénero. O Consistorio repartirá entre os asistentes material da campaña ‘Implícate, son as túas veciñas’.

Exposición no claustro do Concello

Dentro da programación en conmemoración do 25 N, o claustro do Concello acollerá ata o 30 de novembro a exposición da campaña municipal “Implícate, son as túas veciñas”. Unha iniciativa coa que o equipo de goberno local busca concienciar e implicar a todas as persoas na loita contra a violencia de xénero, “ non podemos mirar para outro lado, debemos apoiar ás mulleres que a sofren, dedicando todos os recursos posibles” expresou Lamelas.

Ortigueira súmase á campaña ‘DE FRONTE’ da Deputación da Coruña

O Concello tamén se adheriu á campaña de concienciación e sensibilización da Deputación da Coruña ‘DE FRONTE á violencia de xénero’, que conta cun programa de actividades que apela directamente á implicación dos municipios da provincia. Dentro desta acción, o Concello comparte nas súas redes sociais os contidos da iniciativa.