Skip to content Skip to main navigation Skip to footer

Ortigueira potencia o seu turismo natural e de proximidade con novos roteiros senderistas para o mes de maio

  • Estas celebraranse todos os sábados do mes e as persoas interesadas poderán anotarse na piscina municipal.
  • O concelleiro de Deportes, Anxo Lozano, sinalou a iniciativa como “ unha oportunidade de coñecer os recursos naturais do municipio a través da actividade física”.

O Concello de Ortigueira continúa cos seus roteiros guiados durante este mes de maio. A concellería de Deportes, dirixida
por Anxo Lozano, busca con esta actividade “ofrecer a oportunidade de coñecer os recursos naturais do municipio a través da actividade física”. As persoas interesadas en participar nas próximas actividades poden apuntarse ás mesmas na piscina municipal.

As xornadas continuarán este sábado, día 7 de maio, coa andaina por Loiba – Miradoiro A Coriscada. Un itinerario de dificultade media de aproximadamente 11 quilómetros que comezará ás 09:30 horas desde a estación de Feve de Ortigueira ou ás 10:00 horas desde a de Loiba.

O día 14 continúa a programación co roteiro intermareal de Ladrido, de dificultade media e de aproximadamente 10 quilómetros de duración. A hora de inicio será tamén as 09:30 horas na estación de Feve de Ortigueira ou ás 10:00 horas na de Espasante.

Continuará o mes co roteiro ao mosteiro de San Xoan, o día 21. Un percorrido de dificultade baixa-media de aproximadamente 12 quilómetros. A hora de comezo serán as 10:00 horas na piscina de Ortigueira.

O 28 de maio será a quenda da subida ao refuxio de Mera, ao cemiterio do Ermo, de dificultade media-alta e duns 20 quilómetros de distancia. A subida comezará ás 08:30 horas na estación Feve de Ortigueira ou ás 09:00 horas na de Ponche Mera.

As persoas interesadas poden apuntarse na piscina municipal. Recoméndase levar a todos os itinerarios algo de comida, auga e calzado adecuado e estar 30 minutos antes de que empece a actividade no punto de encontro.

Back to top