Ortigueira impulsa a creación literaria en galego cun concurso de microrrelatos dirixido á mocidade do municipio
O Concello de Ortigueira organiza a segunda edición do Concurso de Microrrelatos ‘Arrós’ en conmemoración do Día das Letras Galegas 2022, co que pretende fomentar a creación literaria en galego. O certame diríxese á mocidade de entre 7 e 18 anos, que terán que escribir un pequeno texto relacionado con esta xornada ou co autor homenaxeado este ano, Florencio Delgado.
O concurso contará con dúas categorías, unha para menores de 7 a 12 anos e outra de 13 a 18. As persoas interesadas en participar poderán presentar os orixinais no Rexistro do Concello ata as 14:00 horas do martes 10 de maio. Os traballos deberán estar escritos en galego, con interlineado de 1,5 en letra Verdana normal en tamaño 10.
A entrega do relato deberase realizar nun sobre pechado, con nome e apelidos do autor ou autora, idade e un teléfono de contacto. Por fóra do sobre indicarase o nome do concurso e o DNI da persoa titora legal.
O gañador ou gañadora de cada categoría terá como premio un vale de 50 euros para comprar material didáctico, escolar ou educativo en establecementos do comercio local. A resolución do xurado, presidido polo concelleiro de Educación e Cultura de Ortigueira, Juan Cao, darase a coñecer o 13 de maio.
Consulta aquí as bases do concurso