Ortigueira dedicará 41.914 euros á reparación da cuberta e fachada do salón de plenos do Concello

• As actuacións permitirán acondicionar o lugar para evitar pingueiras e humidades, así como posibles desprendementos nun edificio que ofrece un importante labor social e que é parte do patrimonio arquitectónico do municipio.
• “As actuacións redundarán no benestar da veciñanza, xa que estamos a falar dun dos lugares públicos máis empregados, que alberga á súa vez o Teatro da Beneficencia e salas de exposición”, indicou Juan Penabad Muras.

Co obxectivo de seguir preservando o edificio do Concello, parte do patrimonio arquitectónico do municipio e un dos espazos públicos máis utilizados pola poboación ortegana, o Concello dedicará 41.914 euros para reparar a cuberta e fachada do salón de plenos.

O orzamento será financiado con cargo ao Plan Único da Deputación da Coruña e permitirá renovar a cuberta coa substitución das tellas dos catro faldóns sobre o salón de plenos. Así pois, levantarase toda a tella existente e reutilizarase aproximadamente un 50% co obxectivo de non alterar a estética do edificio. Tamén se instalarán novos canalóns e baixantes na zona. En canto ás fachadas, proponse actuar no acabado das zonas deterioradas con enfoscado e enlucido de morteiro de cal e acabado con pintura mineral ao silicato en cor branca.

Os traballos permitirán acondicionar un espazo que actualmente conta con deficiencias que poden ocasionar pingueiras e humidades, así como desprendementos de elementos soltos.

“ As tarefas redundarán non benestar dá veciñanza, xa que o edificio do Concello é un dos lugares públicos máis empregados porque presta un importante e necesario labor social a toda a comunidade, ademais de ser uns dos emblemas do noso municipio e de contar nas súas instalación co Teatro da Beneficencia e salas de exposición para exhibir diferentes mostras”, sinalou o alcalde do municipio, Juan Penabad Muras.

A Casa do concello, que data do 1776, foi un convento e albergou ao longo da súa vida un cárcere público, un Cuartel da Milicia Nacional, unha Escola Pública e a sede das oficinas municipais, coas que segue contando hoxe, ademais do Teatro da Beneficencia e diversos espazos empregados como salas de exposicións e escenario para eventos culturais.

“Teño a responsabilidade de coidar o patrimonio de todos os veciños e veciñas, sei que eles necesitan sentir que hai unha man preocupándose polo cuidado de todo. Hai que facer obra nova pero neste Concello hai moito que se cae, e os cartos teñen que ir para aí moitas veces nin se ven. O exemplo é a biblioteca, máis de 300.000 nunha obra de menos de 20 anos. O Concello, a piscina, os centros sociais, o colexio, o mercado”, destacou Penabad Muras.