O goberno municipal e Penabad Muras chegan a un acordo previo para sacar adiante os orzamentos municipais do 2026

O acordo entre o goberno local e o PSOE de Ortigueira inclúe actuacións e investimentos en todas e cada unha das parroquias por valor de tres millóns de euros.

Ademais, crearase unha comisión de seguimento para actualizar periodicamente o grao de execución do acordado entre ambas as partes.

O documento económico, que está a terminar de perfilarse, ascenderá a uns 8,5 millóns de euros, un incremento de máis do 25% respecto do último aprobado, que data de 2022.

O goberno local de Ortigueira chegou a un acordo con Juan V. Penabad Muras, líder do PSOE de Ortigueira, para sacar adiante os orzamentos municipais 2026. No documento de acordo, establécense unha serie de medidas acordadas por ambas as partes para que o municipio poida contar cun documento económico actualizado e adecuado ás necesidades actuais.

Tras as negociacións—nas que participaron o alcalde, Valentín Calvín; a concelleira de Facenda, Isabel Rego, e o propio Muras—, esta folla de roteiro establece actuacións e investimentos a pedimento de Muras por un valor duns tres millóns de euros, que se irán executando de forma progresiva. Ademais, tamén se estima un millón de euros en posibles ingresos municipais extraordinarios.

Ditas investimentos chegarán a todas e cada unha das parroquias e crearase unha comisión de seguimento para ir actualizando o estado de execución. A maioría dos investimentos fan referencia a cuestións básicas como asfaltados, mantemento e ampliación de estradas municipais, iluminación, cuestións relacionadas coa recollida de lixos, ou redes de abastecemento e saneamento; aínda que tamén actuacións puntuais como un novo aparcadoiro de autocaravanas e unhas novas pistas deportivas en Espasante; a ampliación das prazas de aparcamento na contorna do CEIP José María Lage, ou a compra dunha parcelas para crear aparcamentos xunto ao centro social e a igrexa de Cuíña.

Este acordo recolle, segundo explican ambas as partes, “a vontade dunha gran maioría de veciños e veciñas de Ortigueira, que levan meses demandándonos solucións reais, algo que, indiscutiblemente, logramos con este acordo”. “Isto non é máis que o resultado de meses de traballo por e para Ortigueira, pois é o concello o que sae beneficiado”, afirman.

No acordo, ambas as partes manifestan que o seu único propósito é “mellorar os servizos e as necesidades dos veciños e veciñas deste concello, valorando de forma conxunta cales son os proxectos máis prioritarios”. O goberno local considera este pacto “fundamental para a estabilidade do municipio e a execución dos proxectos”.

Por outra banda, lamentan a “falta de colaboración e de sentido de vila” de BNG e Primeiro Ortigueira, con quen tamén mantiveron reunións para chegar a un posible acordo, “quedando claro desde o primeiro momento que antepoñen os seus intereses partidistas e persoais antes que os dos veciños e veciñas de Ortigueira; pois en ningún momento tiveron a intención de chegar a un acordo”.

É por isto que agradecen ao líder dos socialistas de Ortigueira “a boa disposición mostrada para negociar un documento de tanto calado para o Concello”. Destacan que “máis aló das ideoloxías, a razón de ser da política local é mellorar a vida dos nosos veciños e veciñas”.

Por último, o goberno local celebra que “a política de pactos segue sendo posible; iso si, sempre que se dean as condicións necesarias de vontade e altura de miras” e afirma que “continuaremos traballando para construír un futuro mellor para todos”.

Sobre o propio documento económico, que está pendente de pecharse, rolda os 8,5 millóns de euros, un incremento de máis de 2 millóns respecto a as últimas contas aprobadas, en 2022, cando ascendían a 6,2. Isto representa un crecemento de máis do 25%.