O Concello de Ortigueira presenta a programación de actividades para o “Día das Habaneras”

• Ás 20:30h no Cantón, terá lugar a IV edición do ‘Festival Habaneras e Canción Mariñeira’
• Desde o ente municipal animan aos veciños para participar neste día a través e a caracterización e a ornamentación das fachadas

O Concello de Ortigueira presenta a programación de actividades para o “Día das Habaneras”, que terá lugar o sábado 6 de agosto.

A xornada inaugurarase coa actuación de Tabernícolas Ferroláns nos xardíns Julio Dávila. Dará comezo ás 13h e ao finalizar haberá un pasacalle pola Alameda e o Cantón.

Ás 19h terá lugar o desfile de época que transcorrerá entre os xardíns Julio Dávila e o Cantón, que este ano celebra a súa segunda edición.

Ás 20:30h terá o seu punto de partida o prato forte da xornada, que non é outro que o ‘IV Festival Habaneras e Canción Mariñeira’, coas actuacións da Coral polifónica de Ortigueira, Tabernícolas Ferroláns, Proxecto Vocal Proxecto Tempo e Sons de Celeiro. Para poñer punto final ao evento, farase entrega do galardón ‘Ou son dunha vida’ a Xabier Garrote, Fundador do Festival Internacional Mundo Celta e da Escola de Gaitas de Ortigueira.

E xa como colofón a ese día, ás 23h, Jamila Purofilin ofrecerá un concerto a todos os presentes. Nada en Cuba, a artista interpretará os mellores boleros que farán do Cantón unha pequena Habana.

Ademais, durante os días 6 e 7 de agosto, de 11h a 23h, a Asociación de Comercio e Hostalería Ortegana organiza un outlet con temática habaneira nos xardíns Julio Dávila, cos produtos dos seus establecementos.

Desde o Concello de Ortigueira animan aos veciños para participar neste día a través da caracterización e a ornamentación das fachadas.