Máis de 200 mozos celebran o Día da Danza en Ortigueira cunha coreografía no cantón

• O alumnado do CEIP José María Lage, do IES de Ortigueira e veciños e veciñas do municipio saíron esta mañá para bailar ao son de ‘Terra’, canción do grupo Tanxugueiras.
• A iniciativa do Concello tivo como obxectivo “festexar, difundir e poñer en valor a cultura e o baile tradicional, parte da nosa identidade”.

Uns 250 mozos celebraron esta mañá cun baile o Día Mundial da Danza. O cantón de Ortigueira foi o lugar escollido para moverse a ritmo de ‘Terra’, a proposta eurovisiva do grupo Tanxugueiras. Na iniciativa, organizada polo Concello, participaron mozos do CEIP José María Lage e do IES de Ortigueira, así como poboación xeral, tamén convidada a participar no encontro.

Da man do bailador Fredi, de Gamelas e Anduriñas, os e as participantes aprenderon unha coreografía para a canción ‘Terra’, de Tanxugueiras. Unhas clases cuxos froitos se recolleron hoxe co acto celebrado no municipio.

“Non había mellor forma de festexar o Día dá Danza que cunha coreografía de folclore galego, unha forma de difundir e poñer en valor a cultura e o baile tradicional, parte da nosa identidade”, afirmaba o concelleiro de Cultura de Ortigueira, Juan Cao.

“Queremos agradecer a cooperación de Fredi, que acudiu aos centros educativos para ensinar a coreografía, así como a súa colaboración para achegar tamén á poboación xeral interesada en participar na proposta a través dunha clase presencial ou enviando un vídeo co baile para aprendelo desde a casa”, expresou o alcalde, Juan Penabad Muras.

Muras e Cao tamén agradeceron aos centros educativos a súa colaboración na proposta, así como a ASPROMOR, que tivo que cancelar a súa participación por motivos alleos á organización.