JUAN PENABAD SOLICITA UNHA REUNIÓN COA MINISTRA DE TRANSICIÓN ECOLÓXICA PARA EXPOÑERLLE OS EFECTOS NEGATIVOS QUE TERÁ O PARQUE EÓLICO O BARQUEIRO

O alcalde de Ortigueira, Juan Penabad Muras, solicitou formalmente unha reunión coa ministra para a Transición Ecolóxica e o Reto Demográfico, Teresa Ribeira, para expoñerlle os efectos negativos que terá para o municipio o Parque Eólico O Barqueiro.

O equipo de goberno local mostra “a nosa profunda preocupación pola instalación deste parque eólico case na primeira liña de litoral, moi próximo ás casas de vecinos e veciñas, establecementos hostaleiros e explotacións agrarias e forestais, que van sufrir o impacto acústico e visual, así como os posibles efectos nas subministracións de auga e enerxía da zona. Agradecemos que se fagan investimentos pero non podemos hipotecar o presente e o futuro de Ortigueira”, explicou o rexedor, que ten o obxectivo de reunirse coa ministra para “expoñerlle a nosa situación e que coñeza como este proxecto nos afecta negativamente co obxectivo de conseguir o seu apoio para frealo”.

“Aínda que o que ofrecen economicamente é aceptable e tamén hai compromiso de crear emprego isto non é suficiente garantía, os beneficios económicos pódense gastar, pero quedaríanos unha hipoteca de por vida. Non podemos permitir que se faga un cordón de máquinas éolicas de tantos metros de altitude, que alterarán a paisaxe e afectarán ás condicións de vida actuais e actividades dos veciños e veciñas das parroquias de Celtigos, Espasante, Ladrido, Barbos, Mosteiro, Couzadoiro, Devesos, Freires, Cuíña, Mera de Arriba, Santiago de Mera, San Claudio, Ermo e As Neves, ademáis de ao noso valor máis seguro agora mesmo, o turismo” incidiu Muras. “Por enriba de todo, teño que mirar pola calidade de vida dos veciños e veciñas e tamén polo futuro dos que veñen e da xente que nos visita”, sinalou.

O PE O Barqueiro está exposto con 150 MW e afectaría a diversos municipios ao longo do seu percorrido, que vai desde Ortigueira, concello máis afectado, ás Pontes. Este recinto forma parte dun conxunto proxectado para a zona noroccidental da provincia por parte de Enel Green Power.

“Ademais, descoñecemos o camiño que vai seguir este parque, se seguirá ampliándose e cara onde o fará. No noso municipio hai zonas de monte, parte deste incluso municipal, máis cara arriba, onde non hai poboación e onde non tería este impacto negativo”, destacou Penabad Muras, que reflexiona sobre as persoas que poderían marcharse do municipio debido ao impacto do parque, “ non podemos permitilo”.

Oficina municipal para xestionar as alegacións dos veciños

O Concello habilitará a partir de mañá, xoves 19 de agosto, unha oficina na casa do concello para que os veciños e veciñas do municipio que estean en contra da construción do Parque Eólico O Barqueiro presenten as súas alegacións.

Este servizo, para o que se habilitarán todos os espazos que sexan necesarios e que levará a cabo de forma coordinada e segura, estará dispoñible ata o vindeiro xoves, 26 de agosto, de 9 a 14 horas. Para ir máis rápido, o persoal municipal entregará aos interesados un modelo de alegacións redactado polo Concello no que se recollen todas as casuísticas sobre as afeccións que terá o parque no municipio, a nivel xeral e particular, e axudaralles a referenciar a situación das máquinas e de todo o que é o parque, asesorándolles na redacción dos papeis e organizando a entrada e saída de xente do recinto para evitar aglomeracións.

Solicítase aos particulares que traian os seus datos persoais e tamén os da súa propiedade para así cubrir as solicitudes coa máxima precisión posible. Ademais, para aqueles que teñan dúbidas, poderán ver todos os planos do proxecto na sala de exposicións do Concello.

Doutra banda, subirase o documento de alegacións á sede electrónica para que, aquelas persoas que non poidan ir ao Concello, póidano imprimir e presentalo no Rexistro posteriormente. A presentación da documentación debe ser persoal.

Juan Penabad pediu hoxe o apoio dos veciños e veciñas de Ortigueira “ante un tema de moito calado, que nos vai a poñer a proba unha vez máis, e ante unha empresa con experiencia en negociación de grandes proxectos pero que non me asusta” e anímalles a que presenten as alegacións xa que “o obxectivo é que a ministra vexa que o rexeitamento do pobo de Ortigueira é unánime” e lembra que “agora é cando temos que estar aí todos, é necesaria a resposta social firme xa”.

“Para isto, poñemos a disposición de todos os veciños e veciñas que se desexen informar do proceso e presentar as súas alegacións no Rexistro os espazos necesarios, os medios e reforzamos o persoal da casa do concello”, engadiu ou rexedor, que considera que “neste caso non se debe enfocar como unha queixa individual de cada da situación se non como un rexeitamento total da sociedade e as posibles negociacións particulares poden matar fácilmente os argumentos polo que non debemos caer neste erro”.