O servizo de Radioloxía xa conta cunha sala de raios X dixitais

O servizo de Radioloxía xa é unha realidade en Ortigueira. O conselleiro de Sanidade, Antonio Gómez, e a directora xeral de Planificación e Reforma Sanitaria, Sofía López, desprazáronse hoxe ata o Centro de Saúde do municipio, onde foron recibidos polo alcalde, Valentín Calvín, e a concelleira de Cultura, Saúde e Educación, Ana Cartelle.

Sobre as 11:00 horas inaugurouse a sala de raios X dixitais, unha instalación que “dá resposta a unha demanda histórica de Ortigueira”, subliñou na súa intervención o rexedor. Esta foi unha das principais reivindicacións do actual goberno local desde a súa chegada. No verán de 2023 logrou captar o investimento de 151.250 euros por parte da Xunta para que este renovado servizo sexa hoxe unha realidade.

Con esta nova instalación os veciños e as veciñas de Ortigueira minimizarán desprazamentos a outras localidades para realizar probas. Unhas probas que permitirán obter de maneira máis rápida diagnósticos precoces e axudar ao seguimento de patoloxías.

O servizo funcionará de 8:00 a 15:00 horas os martes e xoves.

Calvín insistiu “na notable mellora que este novo servizo de Radioloxía ofrece á nosa atención primaria, mellorando a capacidade diagnóstica e a prevención de enfermidades entre os nosos veciños e veciñas sen ter que saír do municipio”.

Para finalizar, remarcou que “se esta instalación é hoxe unha realidade é grazas á xestión do actual equipo do goberno local, que, en colaboración coa Xunta de Galicia, traballaron duro para mellorar a vida dos orteganos e orteganas”.

OUTROS AVANCES EN MATERIA SANITARIA

Mellorar a atención sanitaria e a calidade de vida dos veciños e veciñas de Ortigueira foi unha das prioridades do goberno dirixido por Calvín. Ademais deste fito, este executivo local ha posto en marcha o SEETA (Servizo Específico de Estimulación Terapéutica do Alzheimer e outras Demencias), unha iniciativa de gran éxito e que tamén contribúe a fortalecer o benestar dos veciños do municipio.

Outras cuestións destacadas son que o Concello de Ortigueira logrou acabar coa lista de espera de dependentes de grao 3 do Servizo de Axuda non Fogar (SAF); ou a adquisición dun vehículo para que os traballadores deste servizo non teñan que acudir aos seus coches particulares para realizar desprazamentos de traballo.