A sala da planta alta da biblioteca municipal de Ortigueira permanecerá pechada a partir do 21 de marzo

O Concello de Ortigueira avanza nas obras de renovación da biblioteca municipal Juan Fernández Latorre, ás que dedica 200.484 euros, enmarcados no Plan Único provincial. Con motivo dos traballos que se están realizando nas instalacións, o Concello sinala que dende hoxe, luns 21 de marzo, a sala da planta alta do inmoble permanecerá pechada.

A biblioteca manterá activos o servizo de préstamo a domicilio e a lectura de prensa en sala na zona habilitada. Durante este período a biblioteca abrirá os luns, mércores e venres en horario de 10:00 a 13:30 horas e os martes e xoves de 10:00 a 13:30 horas e de 16:00 a 20:00 horas.

O proxecto de renovación da construción modernista permitirá mellorar a impermeabilización, a carpintería, a canalización de pluviais e a estética do edificio. Unha actuación fundamental nun lugar que acolle ao longo do ano diversos obradoiros e actos que dinamizan este espazo, moi utilizado pola cidadanía ortigueiresa e un dos epicentros da vida cultural da vila.