Skip to content Skip to main navigation Skip to footer

O MINISTERIO DE EDUCACIÓN REFORZA A AULA CEMIT DE ORTIGUEIRA COA SÚA INCORPORACIÓN AO PROGRAMA AULA MENTOR

A aula CeMIT do Concello de Ortigueira aumenta a súa oferta formativa coa súa incorporación a Aula Mentor, un programa de formación en liña do Ministerio de Educación e Formación Profesional dirixido a maiores de 18 anos. Desde a súa apertura hai 10 anos, a aula CeMIT deu servizo a máis de 1.100 usuarios, ofreceu 9.500 prazas a alumnado de entre 7 e 86 anos e rexistrou 6.500 horas de cursos.

A aula de Informática do Concello celebra este ano o décimo aniversario desde a súa incorporación á Rede CeMIT de Galicia o que, xunto coa aula da Deputación, permitiu incrementar a oferta formativa dixital do Concello dirixida aos veciños e veciñas de Ortigueira.

Actividades da aula

Entre as actividades máis solicitadas atópanse os talleres de alfabetización dixital, de trámites electrónicos ou de uso do smartphone. Segundo indica a responsable e coordinadora do servizo, Verónica Barcón, esta última ten éxito entre as persoas maiores do municipio. Nos diferentes cursos estas poden realizar as súas consultas, manterse ao día e aprender a realizar diferentes solicitudes en liña, así como a manexar aplicacións como a do Sergas Móbil, Sixpac, Catastro ou Seguridade Social. Tamén se enmarca nestas actividades o uso da “nube”.

A aula CeMIT tamén puido ofrecer 4 convocatorias de certificación galega de competencias dixitais en ofimática (Codix), así como charlas de información impartidas por entidades como a Escola Galega de Consumo e outras colaboracións co Sergas, o Centro Demostrador TIC de Galicia e outras institucións.

Adaptación do servizo ao contexto de pandemia

Con motivo da pandemia, o servizo tivo que adaptarse ás medidas de prevención necesarias ante a covid-19, reducindo aforos e ofrecendo dúas liñas de resposta. Por unha banda, as titorías individualizadas con asesoramento e resolución de dúbidas aos usuarios e usuarias. Polo outro, o lanzamento de cursos en liña en colaboración coas aulas CeMIT de Fisterra e Guitiriz, que tiveron unha moi boa acollida ao adaptarse ademais aos horarios laborais.

Back to top