O CONCELLO ORGANIZA UN AMPLO CALENDARIO DE ACTIVIDADES DEPORTIVAS CARA AO VERÁN

O Concello de Ortigueira desenvolverá este ano unha ampla campaña de actividades deportivas para todas as idades, algunhas delas en colaboración coa Deputación da Coruña e outras pola súa conta, que en todos os casos teñen prazas limitadas.

A actividade que ten máis próximo o remate do prazo de inscrición son os cursos de iniciación ao surf que organiza a Concellería de Cultura para adultos e menores empadroados en Ortigueira. Para os primeiros a data límite de inscrición é o 29 de maio e desenvolveranse todas as fins de semana (sábados e domingos) do mes de xuño. O prezo é de 20 euros.

Para os menores entre 10 e 17 anos haberá un curso do 24 ao 28 de xuño -data límite de matrícula o 19 de xuño- e outro do 1 ao 5 de xullo -para o que se poden inscribir ata o 26 de xuño-. O prezo neste caso é de 12 euros. Os cursos terán lugar na praia de Espasante e é requisito imprescindible saber nadar. Facilitaranse traxes de neopreno e tablas.

O Concello organiza tamén cursos de iniciación ao kajak entre os días 1 e 5 de xullo, con 20 prazas dispoñibles. A idade mínima para se apuntar é de 7 anos e é obrigatorio saber nadar. O prezo establécese en 25 euros e a data límite de matrícula é o 26 de xuño.

Como é habitual, desenvolveranse tamén cursos de natación, tanto de iniciación como de perfeccionamento, durante todo o verán. Hai a posibilidade de facer un curso semanal, de luns a venres ou mensual dun ou varios días á semana. Nos cursos semanais os horarios son de 10.00 a 10.45; de 20.30 a 21.15 e de 21.15 a 22.00 para adultos e de 10.45 a 11.30; de 11.30 a 12.15 e de 12.15 a 13.00 para menores de idade. Os prezos pódense consultar na piscina e as prazas son limitadas por orde de inscrición.

Para os campamentos deportivos que se organizan en colaboración coa Deputación o prazo remata o vindeiro día 31 de maio. As solicitudes téñense que entregar na piscina municipal. Hai tres prazas dispoñibles para rapaces e rapazas de 9 a 14 anos de idade e se o número de inscricións é superior levarase a cabo un sorteo. As actividades desenvolveranse no colexio Calvo Sotelo da Coruña, desde onde os participantes se desprazarán a outros lugares para participar en actividades culturais ou deportivas. O prezo é de 85 euros e o campamento terá lugar do 7 ao 12 de xullo.

Tamén en colaboración coa Deputación terá lugar un curso de iniciación á vela que se impartirá do 5 ao 9 de agosto. Neste caso as idades ás que está dirixido son de 9 a 18 anos e o número de prazas é de 40, vinte en horario de mañá e outras vinte en horario de tarde. É imprescindible saber nadar e o prezo é de 25 euros. O prazo de inscrición remata o 24 de xullo.

Por outra banda, o Concello desenvolverá o campamento urbano Ocio Verán, para nenos e nenas de 3 a 12 anos, que inclúe excursións, xogos ao aire libre e acuáticos, actividades deportivas e diferentes obradoiros con base no CEIP José María Lage e visitas á piscina, biblioteca, praia, etc. Por primeira vez terán lugar todas as semanas de xullo e agosto, incorporándose tamén as do Festival Celta e as festas de Santa Marta, datas nas que outros anos non había campamento e aínda que o horario é de 9.30 a 14.00 horas, pódese comezar antes, ás oito da mañá nos casos nos que así se solicite. O prezo é de 22,50 euros para cinco días de actividade; 18 para catro días e 30 no horario ampliado. Haberá descontos do 50% a partir do segundo membro da mesma familia participante.

Nas seguintes ligazóns pode descargarse máis información sobre todas estas actividades:

VER PDF Cartel Kayak 2019

VER PDF Cartel Vela 2019

VER PDF Díptico Vela 2019

VER PDF Ficha Campamento Ortigueira 2019

VER PDF Cartel campamentos deportivos 2019

VER PDF Tríptico campamentos deportivos 2019

VER PDF Cartel Surf 2019

VER PDF Cartel Ocioverán 2019

Back to top