Skip to content Skip to main navigation Skip to footer

O CONCELLO AMPLIARÁ O PUENTE SOBRE A VÍA DO TREN EN CORTES DENTRO DAS ACTUACIÓNS PARA REFORZAR A SEGURIDADE VIARIA NO MUNICIPIO

O reforzo da seguridade viaria segue sendo unha máxima para o goberno local de Ortigueira. Baixo esta premisa, o Concello acaba de sacar a licitación un novo proxecto de acondicionamento de rúas, beirarrúas e elementos de seguridade viaria e información en Ortigueira, Espasante e Luama por 125.000 euros. O alcalde, Juan Penabad Muras, sinala a importancia destas actuacións, coas que se seguirán “reforzando as condicións de seguridade tanto para a circulación dos vehículos como para o tránsito de peóns en dous dos núcleos máis urbanos do termo municipal”.

En total, proxéctase a execución de cinco intervencións nestes lugares. Por unha banda, no lugar de Cortes ( Luama) actuarase no paso elevado sobre a vía de ferrocarril. Actualmente, este punto carece do ancho suficiente e o firme está danado polo paso do tempo e as condicións meteorolóxicas, o que dificulta a circulación de coches pola zona. Co fin de resolver esta situación, demolerase o peitoril existente nos laterais e instalarase, no seu lugar, unha varanda metálica con bionda, incrementando así o ancho da vía. Ademais, acondicionarase o firme existente e procederase á limpeza de cunetas nas marxes. Esta actuación dá resposta a unha vella demanda dos veciños e veciñas da zona e que, ao contar xa coas autorizacións de Feve, está máis preto de ser unha realidade.

Outro dos traballos consistirá na mellora da sinalización en Espasante e Ortigueira. A día de hoxe, algunhas zonas de ambos os núcleos contan con sinalización deficiente e que garante pouca visibilidade. A realización destas actuacións supoñerá a instalación de 38 indicadores solares con tecnoloxía LED nas inmediacións dos pasos de peóns para mellorar a visibilidade destes pasos a gran distancia e a seguridade dos propios viandantes que se dispoñan a cruzar a vía.

O Concello dispoñerá, así mesmo, novos sinais que indiquen, por unha banda, o comezo do polígono industrial e, polo outro, os límites do termo municipal. Na mesma liña, e co fin de proporcionar información tanto aos veciños e veciñas como ás persoas visitantes, colocaranse pantallas informativas con tecnoloxía LED nos dous núcleos.

Por último, levará a cabo o repintado de todas as sendas de peóns de Espasante e Ortigueira, substituíndo a capa de pintura actual, que se atopa en mal estado debido ao paso do tempo e ás condicións meteorolóxicas.

O prazo de presentación de ofertas concluirá o 5 de outubro e, unha vez asinada a acta de comprobación do reformulo, a empresa adxudicataria terá un prazo de execución de catro meses.

Back to top