Un mural conmemorativo celebrará o 50 aniversario do CEIP José María Lage

Na xornada de onte, martes 1 de abril, representantes do Concello de Ortigueira desprazáronse á Deputación da Coruña para manter unha reunión co vicepresidente, Xosé Regueira, na que se abordaron diversas iniciativas de mellora para o municipio.

No encontro, ao que asistiron o alcalde, Valentín Calvín, e as concelleiras Isabel Rego e Joaquina Piñeiro, Regueira expresou o seu compromiso de financiar e promover a creación dun mural conmemorativo polo 50 aniversario do CEIP José María Lage, unha iniciativa que busca homenaxear a historia e o papel educativo do centro na localidade.

Ademais, o vicepresidente da Deputación tamén adquiriu o compromiso de impulsar melloras na contorna do muíño do Campo dá Torre, co obxectivo de poñer en valor este espazo de gran importancia patrimonial e ambiental para Ortigueira.

O alcalde, Valentín Calvín, quixo agradecer o respaldo da Deputación para a realización destes proxectos: “É unha gran noticia para Ortigueira contar con este apoio, que permitirá render homenaxe a un centro educativo tan importante para o noso municipio e, ao mesmo tempo, mellorar unha contorna natural e patrimonial tan emblemático como o do muíño do Campo da Torre. Agradecemos a implicación da Deputación e seguiremos traballando xuntos para seguir mellorando Ortigueira”.

Desde o Concello, valórase moi positivamente a disposición da Deputación para colaborar nestes proxectos, que contribuirán a embelecer e mellorar distintos espazos do municipio.