Ortigueira xa forma parte do catálogo de cidades alfonsíes

• Juan Penabad Muras asistiu esta mañá á constitución da Comisión en Toledo na que participan representantes de numerosas localidades de toda España e a través da que se busca impulsar actividades para difundir a historia do rei nos municipios que configuran esta rede.
• A Comisión foi promovida polo Concello de Toledo e a FEMP con motivo do VIII Centenario do nacemento de Afonso X o Sabio.
• “Unha oportunidade única para promocionar e impulsar unha nova forma de facer turismo, cultural, de calidade, que dea a coñecer en profundidade momentos da historia moitas veces esquecidos ou descoñecidos”, indicou Juan Penabad Muras.

Ortigueira xa forma parte do catálogo de cidades alfonsíes promovido polo Concello de Toledo e a Federación Española de Municipios e Provincias (FEMP) con motivo do VIII Centenario do nacemento de Afonso X o Sabio. O alcalde de Ortigueira, Juan Penabad Muras, asistiu esta maña á constitución da Comisión en Toledo na que participan representantes de numerosas cidades de toda España e a través da que se busca impulsar actividades para difundir a historia do monarca nos municipios que configuran esta rede. “Esta Comisión xorde do compromiso e aposta común polo patrimonio, a cultura e a historia dos nosos pobos e cidades e constitúe unha oportunidade única para promocionar e impulsar unha nova forma de facer turismo”, argumentou na súa intervención o alcalde Juan Penabad Muras. “Un turismo cultural, de calidade, que dea a coñecer en profundidade momentos da historia moitas veces esquecidos ou descoñecidos”.

O rexedor destacou que formar parte desta rede xunto con municipios como Córdoba, Burgos, Toledo, Salamanca ou Valladolid, entre moitos outros, atraerá a novos visitantes, o que supoñerá un importante beneficio para a economía local. Os principais obxectivos desta Comisión formada polos concellos vinculados á vida de Afonso X son facilitar un maior coñecemento e relación dos lugares vinculados ao rei; apoiar e difundir actividades conxuntas entre os membros da Comisión; e difundir a vida e reinado de Afonso X, potenciando programas educativos e culturais que permitan dar a coñecer a súa obra e promover unha política cultural que se axuste aos obxectivos marcados.

Pedro el Gallego, o ortegano confesor de Afonso X

“A historia de Ortigueira con Afonso X é peculiar”, manifestou Penabad Muras, e é que o municipio galego formou parte da vida do rei a través do ortegano coñecido como Pedro el Gallego, quen foi confesor do rei. A súa relación con el outorgoulle a Ortigueira unha serie de privilexios coa concesión do Foro de Benavente, a mellor lexislación medieval que só estaba reservada a vilas cunha maior entidade. Este privilexio achegou a Ortigueira un mercado anual de grandísima importancia, “unha iniciativa que agora buscamos recuperar a través deste proxecto”, sinalou Penabad Muras.

O Concello xa analiza a viabilidade de futuras actividades dentro do proxecto para conmemorar o VIII Centenario

A concellería de Cultura de Ortigueira xa se atopa en proceso de xestión coa Fundación Artesanía de Galicia para analizar as opcións para recuperar esta feira, que acollería a produtores locais e artesáns nas instalacións do claustro dominico e o mercado vello da Praza Isabel II. “Un encontro co que buscamos potenciar os produtos locais e de proximidade, poñendo en valor ás nosas produtoras e produtores, así como ás artesás e artesáns de Ortigueira”, argumentou o rexedor do municipio.

Dentro das actividades de dinamización que os Concellos deben propoñer á Comisión, o alcalde de Ortigueira tamén anunciou que se preparan diversos espectáculos e actividades culturais.

Penabad Muras aproveitou a súa intervención na Comisión de cidades para lembrar que “se ben nos gustaría contar cun programa ambicioso, é complicado para un Concello pequeno coma o noso abordar presupostariamente unha iniciativa coma esta, por iso considero que nun futuro poderían tamén incorporarse a esta Comisión aos Gobernos autonómicos e ás Deputacións dos municipios implicados”. A través da Comisión os municipios participantes terán unha rede interna de comunicacións para colaborar en diferents proxectos do ámbito.