Ortigueira avanza na recuperación da antiga escola unitaria de Loiba para dedicala a uso público

O Concello de Ortigueira dá pasos adiante para recuperar a antiga escola unitaria de Loiba e dedicala a usos de competencia municipal.

O pleno da Corporación local aprobou esta semana a desafectación do edificio para poder acometer as obras de rehabilitación necesarias no mesmo.

O inmoble situado no lugar de Igrexa, na parroquia de Loiba, data do ano 1933 e conta con dúas plantas: unha baixa que acolle aulas e outra alta na que residían antigamente os profesores e profesoras. Unhas instalacións que na actualidade atópanse en desuso despois de que no ano 2015 a Consellería de Educación procedese ao seu peche por falta de matrícula.

Para avanzar na súa recuperación, o Concello solicitou á Delegación Provincial de Educación e Ciencia a desafectación do servizo público de parte do inmoble, concretamente a vivenda do profesor, situada á esquerda do edificio e cunha superficie construída na planta baixa de 85 metros cadrados e un faiado de 30 metros cadrados para a súa clasificación como ben de propios.

Esta actuación obedece á obrigatoriedade que ten o Concello de ter plena dispoñibilidade do edificio para poder acometer as obras de rehabilitación necesarias no mesmo.

“Un paso adiante para recuperar unha infraestrutura que non pode caer no esquecemento co máximo obxectivo de devolvela á veciñanza de Loiba, coa que traballaremos man a man atendendo sempre aos seus intereses e peticións para escoller o futuro uso do inmoble”, manifestou o alcalde, Juan Penabad Muras.