Escola de Familias de Ortigueira organiza un obradoiro sobre xestión emocional e resolución de conflitos

O Concello de Ortigueira, no marco do seu proxecto ‘Escola de Familias’, organiza un taller sobre a xestión emocional e resolución de conflitos.

Esta actividade, segunda sesión da Escola de Familias, ten o obxectivo de apoiar ás familias no seu día a día, ofrecéndolles ferramentas para mellorar a comunicación, manexar emocións e resolver desacordos de maneira positiva.

O encontro terá lugar o próximo 21 de maio, en horario de 17:00 a 19:00 h, no antigo Hospital de San Roque e estará guiado por Rocío Álvarez, especialista en formación, asesoría educativa e terapeuta.

Esta iniciativa forma parte do compromiso de Escola de Familias de Ortigueira por acompañar e reforzar o papel das nais, pais e persoas coidadoras como axentes crave na educación e benestar dos nenos e nenas, formación e apoio mutuo.

A actividade é gratuíta e está aberta a todas as familias do municipio. Para participar, será necesario inscribirse previamente no teléfono 981 400 000, contactando coa educadora familiar. As prazas son limitadas e cubriranse por orde de inscrición.

Escola de Familias

O proxecto ‘Escola de Familias’ é unha iniciativa destinada a mellorar a comunicación no núcleo familiar e proporcionar ferramentas educativas a pais e nais para fomentar o benestar dos seus fillos e fillas.

Este programa xorde co obxectivo de fortalecer as relacións familiares, mellorar o vínculo afectivo e dotar ás familias de estratexias en materia de educación, disciplina positiva, establecemento de límites e normas no fogar.

Así mesmo, abordará temas de especial relevancia como a prevención de condutas de risco, o acoso escolar, as adiccións e os trastornos emocionais na infancia e a adolescencia. Búscase, ademais, potenciar o traballo conxunto entre as familias e os centros educativos, garantindo que a formación que se imparte en colexios e institutos chegue tamén aos fogares.