As rutas de sendeirismo, xeolóxicas e ornitolóxicas protagonizan a axenda do mes de abril en Ortigueira

• A través destas iniciativas o equipo de goberno local fomenta un turismo de proximidade que integra a actividade física coa paisaxe natural do municipio.
• As propostas levaránse a cabo os días 2, 9, 14, 15, 16, 23 e 30 de abril.
• O prazo para apuntarse a estas actividades gratuítas está aberto.

Ortigueira conta cun patrimonio natural de enorme riqueza. É por iso polo que desde o Concello continúase co impulso dos seus xa tradicionais rutas de sendeirismo, xeolóxicas e ornitolóxicas. “Unha forma de achegar o noso á cidadanía e a aquelas persoas que nos visitan, integrando a actividade física coa paisaxe”, explica o concelleiro de Deportes, Anxo Lozano. Pola súa banda, o edil de Turismo, Juan Cao, informa que “é unha oportunidade única de promover un turismo de natureza de proximidade e calidade”.

Lugares como o alto de Miudelos, Senra, a praia de Morouzos ou Espasante son parte dos percorridos organizados desde o Concello. As persoas interesadas en participar poden apuntarse na piscina municipal.

Así pois, a programación comeza este sábado, 2 de abril, cunha camiñada ao alto de Miudelos. Un roteiro duns 5 quilómetros de dificultade baixa. A actividade empezará ás 10:00 horas e o punto de encontro será a piscina de Ortigueira.

O sábado 9 será a quenda do paseo ornitolóxico de Senra. Un itinerario de aproximadamente 10 quilómetros de dificultade media-baixa. A proposta deportiva comezará ás 10:00 horas desde a piscina municipal. Recoméndase levar guía de aves e prismáticos.

Continúa a axenda o sábado 23 cun percorrido e picnic na praia de Morouzos. Esta será duns 5 quilómetros de dificultade baixa e dará comezo ás 10:00 horas desde a piscina. Recoméndase levar algo de comida para compartir.

O mes de abril finaliza cunha excursión polos cantís de Céltigos o día 30. Un percorrido de dificultade media duns 15 quilómetros de lonxitude. O punto de encontro será a estación de Feve en Ortigueira ás 09:30 horas ou no aparcamento da praia de San Antonio en Espasante ás 10:00 horas. O horario dos trens é o seguinte:

Ortigueira- Espasante
9:38 h – 9:43 h
12:04 h -12:00 h

Espasante- Ortigueira
13:18 h – 13:24 h
16:43 h – 16:50 h
20:22 h – 20:28 h

Os e as participantes deben levar a todos estes percorridos algo de comida, auga e calzado adecuado. Recoméndase estar uns 30 minutos antes de que empece a actividade no punto de encontro.

Iniciativas para a Semana Santa

A axenda da Semana Santa comezará coa ruta xeolóxica dos Penidos o xoves 14 de abril ás 16:30 horas. Un itinerario circular pola parroquia de San Adrián, que atravesa o maior afloramento mundial dun tipo de roca con máis de 100 quilómetros de profundidade. A actividade durará unhas catro horas e media ao ter un percorrido de 8 quilómetros de dificultade media. Neste caso, as persoas interesadas en participar deberán anotarse na seguinte ligazón https://rutasxeoloxicasdegalicia.blogspot.com.

O venres 15 de abril terá lugar, por primeira vez e como novidade do programa, o percorrido de sendeirismo da costa de Loiba e Esteiro. A saída realizarase ás 10:00 horas desde a oficina de Turismo e as persoas participantes deberán levar coche propio. O regreso estimado da actividade será ás 14:00 horas. A distancia do percorrido é de 6 quilómetros de dificultade baixa. Dentro do material necesario para desenvolver a iniciativa atópase a máscara, botas de monte, bastón, roupa cómoda, auga e comida. As persoas interesadas poden anotarse na oficina de Turismo de Ortigueira ou chamando ao 981 422 089.

Por último, o 16 de abril, organízase unha camiñada polos cantís de Espasante e Céltigos. A saída farase tamén desde a oficina de Turismo e necesitarase coche propio. O regreso realizarase, mais ou menos, ás 14:00 horas. O percorrido será duns 8 quilómetros e o material para achegar na actividade será o mesmo que na do día 15. As inscricións realizaranse na oficina de Turismo de Ortigueira ou chamando ao 981 422 089.