A conmemoración do 8M marca a axenda de marzo en Ortigueira

• Os actos con motivo do Día da Muller continúan mañá coa lectura do manifesto e un espectáculo de maxia con perspectiva de xénero e finalizarán coa inauguración dun patio violeta na biblioteca municipal.
• Ao longo do mes a programación contará con espectáculos de teatro e música e roteiros de sendeirismo.

Marzo chega a Ortigueira cunha axenda de actividades dirixidas a todos os públicos. O Concello programa actuacións con perspectiva de xénero e a inauguración dun patio violeta con motivo do 8 de marzo, Día da Muller, e anuncia iniciativas teatrais, musicais e unha exposición.

Os actos en conmemoración do Día da Muller continúan mañá, 8 de marzo, coa lectura do manifesto ás 12:00 horas e a concentración diante do Concello. Pola tarde, ás 18:00 horas, celebrarase no Teatro da Beneficencia o espectáculo de maxia con perspectiva de xénero “Igualdade, cousa de maxia?” coa meiga Fani.

O 15 de marzo inaugurarase o patio violeta da biblioteca Juan Fernández Latorre. “Un espazo dedicado á igualdade, á coeducación e á prevención da violencia de xénero”, sinala a edil de Igualdade, María Lamelas. “Un proxecto que visibilizará ademais o papel da muller e as obras de importantes escritoras” remarcou. O lugar situarase no patio central das instalacións e nel poderanse atopar libros ou DVDs, entre outros. A iniciativa nace da colaboración da Biblioteca municipal e o CIM de Ortigueira e é financiado a través do Pacto de Estado contra a Violencia de Xénero.

Axenda cultural

A programación do mes de marzo contará ademais co pregrón da Semana Santa na igrexa parroquial de Ortigueira ás 19:00 horas do venres 18. Este será realizado por Xesús Andrés López Calvo. A actividade está organizada pola Confraría Virxe das Dores e do Nazareno e o Centro de Atención Pastoral.

O sábado 19 ás 19:30 horas o Teatro da Beneficencia acollerá o teatro ‘O Montacargas’ de Ainé Produccións. As entradas teñen un custo de 3,5 euros.

O sábado 26 de marzo continúa o programa co ciclo ‘Festival no Teatro’, que leva a actuación musical de Faia ao Teatro da Beneficencia. A música tradicional escoitarase a partir das 19:30 horas e a entrada ao evento ten un custo de 4,5 euros.

Á súa vez, desde o 10 de marzo ata o 27 do mesmo mes a sala de exposicións do primeiro piso da Casa do Concello acollerá a exhibición do 15º Premio de Creación Fotográfica Luís Ksado da Deputación da Coruña. A mostra poderá visitarse en horario de 10:00 a 14:00 horas.

Roteiros de sendeirismo para seguir descubrindo Ortigueira

O Concello segue cos seus roteiros de sendeirismo para dar a coñecer o importante patrimonio natural e paisaxístico do municipio e, á súa vez, fomentar a actividade física. A próxima xornada terá lugar o sábado 12 de marzo e permitirá ás persoas participantes descubrir o roteiro de O Casón. Aproximadamente 14 quilómetros de dificultade media-alta. A actividade dará comezo ás 08:30 horas no Feve de Ortigueira, punto de encontro para coller o tren, ou directamente no centro social de San Adrián ás 09:15 para aquelas persoas que vaian en coche. O horario de trens é o seguinte:

Ortigueira-Ponche Mera

08:43 h – 08:51 h

13:24 h – 13:32 h

Ponche Mera-Ortigueira

09:30 h -09:38 h

11:55 h -12:04 h

16:39 h -16:49 h

20:16 h -20:27 h

As persoas participantes deben levar roupa e calzado adecuado, comida e auga. O Concello recomenda estar no punto de encontro media hora antes de dar comezo a actividade. As persoas interesadas en participar poderán facelo anotándose na piscina municipal.