A Banda da Escola de Música Municipal de Ortigueira fai un chamamento en conmemoración do 25º aniversario

Este curso escolar, a Escola de Música Municipal de Ortigueira celebra con orgullo 25 anos de traxectoria, sendo un referente musical e cultural no noso concello. Para conmemorar esta especial ocasión, a ESMU convida a todas as persoas que, dalgún xeito, formaron parte da súa historia a integrarse nas súas agrupacións e compartir a emoción da música nunha serie de concertos únicos.

A Banda de Música da ESMU Ortigueira fai un chamamento a todos os músicos –exalumnos, amigos, instrumentistas de vento madeira, metal e percusión– a unirse aos novos talentos da Banda da ESMU. Xuntos, renderán homenaxe a estes anos de aprendizaxe, música e comunidade, actuando en concertos especiais ao longo do curso académico.

O próximo concerto, que terá lugar o día 20 de decembro na Igrexa de Ortigueira, estará inspirado na Divina Comedia de Dante, unha experiencia musical que promete ser inesquecible. A dirección da banda corre a cargo de Carlos Diéguez, quen conta co apoio didáctico dos profesores Vicente Rey e Alejandro Vázquez.

Se queres revivir vellos tempos, volver facer soar o teu instrumento e unirte a esta celebración, non dubides en poñerte en contacto connosco por correo electrónico (escolademusica@concellodeortigueira.com) ou chamando ao teléfono: 633-763-890, para recibir toda a información necesaria sobre os ensaios, horarios e partituras para o concerto.

Anímate a formar parte desta gran celebración musical!