O CONCELLO PREVÉ DEDICAR 173.345 EUROS Á MELLORA DA REDE DE ABASTECEMENTO NO NÚCLEO URBANO DE ORTIGUEIRA
O Concello prevé destinar 173.345 euros á mellora da rede de abastecemento do núcleo urbano de Ortigueira. O pleno da Corporación local deu luz verde cos votos a favor do PSOE e a abstención de PP, Primeiro Ortigueira e Centristas para solicitar á Deputación dá Coruña a inclusión deste proxecto dentro da segunda fase do Plan Adicional provincial.
“Con esta iniciativa queremos seguir coa mellora de infraestruturas municipais co obxectivo de ofrecer mellores servizos aos nosos veciños e veciñas”, indicou o alcalde de Ortigueira, Juan Penabad Muras. As actuacións permitirán substituír as canalizacións para a subministración de auga potable. Tamén se inclúen nos traballos a apertura e posterior reposición do firme e o pavimento das zonas afectadas.
O equipo de goberno local informa de que o Concello ten a dispoñibilidade dos terreos e augas así como as autorizacións administrativas que legalmente son necesarias para realizar as actuacións.
No pleno ordinario celebrado onte tamén se aprobou co voto de calidade do alcalde a modificación da natureza xurídica de diversas prazas do persoal do persoal municipal. Así pois, o posto de asesor/a xurídico/a, o de axente de emprego e desenvolvemento local, o de orientador/a laboral e os dous de psicólogo/a pasarán a estar reservadas a persoal funcionario. Este cambio foi pactado e decidido polas persoas que ocupan actualmente de forma transitoria estes cargos. “É necesario que haxa igualdade e ou xusto é que todos vos veciños e veciñas teñan vos mesmos dereitos e oportunidades”, remarcou o alcalde. Ata que non se proceda á súa provisión definitiva, esta modificación non afectará o persoal temporal actual.
“Agora abrimos un período de exposición pública durante quince días, nos que as persoas interesadas poderán examinar o proceso e, se o desexan, presentar reclamacións”, indicou o alcalde. Esta medida forma parte do proceso de estabilización de emprego temporal que está a realizar o Consistorio de acordo cos criterios marcados polo Ministerio de Facenda, que teñen por meta a redución da taxa de temporalidade nas administracións públicas a unha porcentaxe inferior ao 8%.
Parque Eólico do Barqueiro
O 8 de setembro, tamén se celebrou un pleno extraordinario a pedimento da oposición no que o rexedor explicou as medidas e trámites que o Concello levou e levará a cabo en relación ao proxecto do parque eólico O Barqueiro.
Juan Penabad Muras explicou na sesión as alegacións presentadas e o funcionamento da oficina do Concello destinada a ofrecer toda a información do proxecto aos veciños e veciñas, así como do servizo de asesoramento para aquelas persoas que quixesen presentar alegacións. O rexedor sinalou que este recurso segue operativo, e que poden, aínda, presentarse alegacións. . “A documentación está a disposición dos veciños, e estamos preparando diferentes materiais complementarios, para ofrecer a información máis completa posible”, informou Penabad Muras. . “É a primeira vez na historia deste Concello que se pon a disposición da poboación todos os detalles dun proxecto eólico”, indicou e sinalou que a empresa non enviou ao Concello ningún documento para a súa exposición e consulta pública.
O Concello xa trasladou ao Ministerio para a Transición Ecolóxica e o Reto Demográfico as alegacións contra o parque, nas que sinala os efectos negativos que terá a instalación destes aeroxeradores a nivel social, económico e ambiental, así como o incumprimento de diversas normativas nas localizacións seleccionadas para a súa disposición. Así pois, o proxecto vulnera a normativa ambiental da UE, supón unha fragmentación artificial e ilegal do conxunto, presenta aeroxeradores fóra das ADEs do Plan Sectorial Eólico de Galicia e vulnera o benestar dos veciños con vivendas próximas, entre outros elementos para ter en conta.
A presentación destas alegacións súmase á reunión que o rexedor solicitou á ministra de Transición Ecolóxica e Reto Demográfico, Teresa Ribera, para expoñerlle os efectos negativos que terá para o municipio o parque eólico.
Penabad Muras tamén escoitou aos veciños e veciñas que se concentraron diante do Concello por este asunto na mesma xornada do pleno.