Skip to content Skip to main navigation Skip to footer

Coñecementos básicos en servizos financeiros a través dunha sesión formativa na Aula CeMIT de Ortigueira

  • Este espazo acollerá o próximo 26 de outubro ás 12:30 horas a conferencia ‘Consumo Responde’, impartida polo Instituto Galego do Consumo e dá Competencia.
  • Os participantes poderán adquirir novos coñecementos sobre contas bancarias, pago básico, créditos ou tarxetas revolving, entre outras.
  • As persoas interesadas poden inscribirse xa a través do teléfono 981 40 25 33.

O Concello de Ortigueira achega á poboación coñecementos básicos en servizos financeiros a través da sesión formativa ‘Consumo Responde’, que será impartida polo Instituto Galego do Consumo e da Competencia. A conferencia terá lugar o 26 de outubro ás 12:30 horas na Aula CeMIT do municipio e as persoas interesadas poderán inscribirse no teléfono 981 40 25 33.

Na charla, que será realizada a través dunha videoconferencia, os e as participantes poderán aprender sobre contas bancarias. No temario figura o pago básico, créditos ou tarxetas revolving, entre outros. “A través desta sesión formativa ampliaranse os coñecementos da veciñanza neste eido, un servizo básico que todos temos que empregar e cuxos mecanismos ou formas de operar descoñecemos moitas veces”, explica o concelleiro de Educación, Juan Cao.

Unha Aula en desenvolvemento

A aula CeMIT do Concello viu ampliada este ano a súa oferta formativa por mor da súa incorporación á Aula Mentor, un programa de formación en liña do Ministerio de Educación e Formación Profesional dirixido a maiores de 18 anos. Desde a súa apertura hai 10 anos, a Aula CeMIT deu servizo a máis de 1.100 usuarios, ofreceu 9.500 prazas a alumnado de entre 7 e 86 anos e rexistrou 6.500 horas de cursos. Ademais, este servizo celebra este ano o décimo aniversario desde a súa incorporación á Rede CeMIT de Galicia o que, xunto coa aula da Deputación, permitiu incrementar a oferta formativa dixital do Concello dirixida aos veciños e veciñas de Ortigueira. Entre as actividades máis solicitadas atópanse os talleres de alfabetización dixital, de trámites electrónicos ou de uso do smartphone.

Back to top